Наведвальнікі Мастацкай галерэі Міхаіла Савіцкага стануць галоўнымі героямі дынамічнага і заблытанага сцэнарыя Інтэлектуальнай ночы - 2017. Мы прапануем Вам адчуць сябе ў ролі хітрамудрага дэтэктыва, кемлівага даследчыка, вынаходлівага алхіміка, апантанага калекцыянера. Музей запрашае камандных гульцоў, дружныя сем'і, закаханыя парачкі, і, тых, хто любіць гуляць сам па сабе.
Праграму ночы музеяў у 19.00 распачне інтэрактыўная экскурсія ад аўтараў выстаўкі "Плюс/мінус" Уладзіміра і Марыты Голубевых. Спалучэнне красамоўнага выкладчыка-аратара і таленавітага мастака ў адной асобе стварае незабыўны экскурсійны кактэйль, які падагрэе вашу цікаўнасць і натхніць на новыя адкрыцці музейнай ночы.
У 20.30 у вялікай выставачнай зале пачнецца Беларуская інтэлектуальная гульня для тых, хто загаддзя зарэгістраваўся. Калі вы не паспелі гэтага зрабіць - не бяда, для вас падрыхтаваны не менш займальныя прыгоды.
Адкрываць музейныя таямніцы, разгадваць загадкі, каб скласці ўвесь пазл не зусім проста. Вам у дапамогу - падказкі музейных супрацоўнікаў, сустрэчы з былымі гаспадарамі сядзібнага дома, астранамічныя знакі, адбіткі слядоў, карты і компас. Праходзіць квесты можна на працягу ўсёй музейнай ночы.
У 22.00 у парадным двары галерэі пачнецца канцэртная праграма - выступленне вулічных гарадскіх музыкантаў.
Самым цікаўным даследчыкам музей прапануе паўдзельнічаць у розыгрышы "Спатканне на даху", якое па традыцыі завяршае музейную ноч у Мастацкай галерэі Міхаіла Савіцкага. Апоўначы дваім пашчасціць апынуцца пад зорным небам начнога Мінска над дахамі Верхняга горада.
Уваходны білет - 5 руб.